„Русија е столбот на демократијата и нема да дозволи мешање во внатрешните работи, без  силна и суверена Русија, не може да постои стабилен светски поредок“ – порача шефот на Кремљ Путин во говорот за состојбата на нацијата. Според него, Москва не ја почнала војната во регионот Донбас во 2014 година, но ќе презеле сѐ што е потребно за да заврши и да го искоренат, како што вели, „нацизмот“.

„Секое обраќање пред федералното собрание, пред сѐ, претставува поглед кон иднината. Денеска не зборуваме само за нашите сегашни планови, туку и за стратегиските задачи, за прашањата чиишто решенија ги сметам за исклучително важни за стабилен, долгорочен развој на земјата“, изјави Путин. 

Путин изрази надеж за т.н.„нови точки за контакт“ со арапските, јужноамериканските и африканските земји. Од почетокот на војната, Русија се соочи со серија санкции од Европа, Обединетото Кралство и од Соединетите Американски Држави

За две недели во Русија се одржуваат претседателски избори на коишто Путин ќе се кандидира за уште еден шестгодишен мандат.

Настанот е пропишан и со Уставот во Русија и со него се претставуваат годишните пораки за состојбата на нацијата и насоката на политиките. Говорот, што се одржува по 19. пат, беше откажан во првата година од руската инвазија во Украина.