Гренланд и Исланд во мај беа погодени од рекордно високи температури кои наместа се искачија и за над 10 степени целсиусови над просечните за овој период од годината. Температурата на аеродромот Егилстадир во Исланд достигна 26,6°C, што е највисока мајска температура досега измерена во земјата.

Научниците велат дека оваа екстремна промена е последица на климатските промени предизвикани од луѓето, како што е согорувањето фосилни горива. Гренландската ледена плоча почна да се топи многу побрзо од нормалното, а тоа може да има глобални последици, вклучувајќи и забавување на Атлантската меридионална циркулација – клучна океанска струја што влијае на климата во Европа и пошироко.

Топењето на мразот придонесува и за пораст на нивото на морињата, што претставува закана за крајбрежните области и ниските островски држави. Овој рано започнат топлотен бран значи и подолга сезона на топење ова лето, со дополнителни последици за климата и морското ниво.