Државниот завод за ревизија утврди низа неправилности во работењето на Општина Свети Николе, вклучувајќи неевидентирано земјиште, бесправно изградени објекти и непостапување за наплата на комунални такси.

Исто така, општината остварувала приходи од сместување во Детското одморалиште во Стар Дојран без потребни согласности, а детската градинка „Рахилка Гонева“ во село Ерџелија не е функционална.

Ревизорите наведуваат дека распределбата на буџетските средства е несоодветна – 89% се дадени на спортски клубови и здруженија, а само 11% на спортски манифестации, додека културните и НВО програмите се спроведуваат без јавни повици и критериуми.

Исто така, нередовно се евидентираат инвестициите, материјалите и побарувањата на општината, а ненаплатените побарувања изнесуваат над 1 милион евра.

Покрај тоа, општината не обезбедила законска постапка за легализација на бесправно изградени објекти, не наплатува комунални такси за користење јавен простор и музика во локали, и нема воспоставено зелен катастар и годишна програма за одржување на зеленилото.