На граничниот премин Ќафасан е спречен увоз на повеќе од 26 тони замрзнато пилешко месо. Инспектори од Агенцијата за храна и ветеринарство утврдиле дека пратката не ги исполнува условите за влез во државата, бидејќи месото потекнува од Бразил, земја за која е воведена забрана поради ризик од појава на птичји грип. Поради ова, увозот не бил дозволен, а пратката била вратена назад во земјата од каде што била испратена.

„Забраната за увоз е изречена бидејќи пратката била во спротивност со донесеното решение за забрана на увоз на живи животни, производи и нуспроизводи од животинско потекло од Бразил заради заштита од внесување на вирусот на високо патогена авијарна инфлуенса (птичји грип) според кое, забранет е увозот на пратки кои се добиени од животни кои се заклани, натоварени и сертифицирани пред август 2025 година“, соопштија од Агенција за храна и ветеринарство.

Освен забраната за увоз на бразилско месо, во ноември Агенцијата за храна и ветеринарство реализираше повеќе интервенции со кои беше спречен внес на небезбедна храна. По пријава, во Чучер-Сандево беа запленети над 2,5 тони јаткасти плодови без потекло и документација, а неколку дена подоцна беа уништени и околу 37 тони храна со поминат рок на употреба.

Тамара Марковска