Најмалку 33 лица се ранети откако попладнево руска воздушна бомба погоди катна станбена зграда во Харков, изјави градоначалникот Ихор Терехов, додавајќи дека наведуваната бомба го погодила 10-тиот кат од зградата, а огнот се проширил на четири ката.

Меѓувреме, две лица загинаа во ракетен напад врз украинскиот пристанишен град Одеса, соопштија локалните власти, додека Москва и Киев разменија оган со беспилотни летала и ракети.

Украинските воздухопловни сили денеска соопштија дека собориле 10 од 14-те беспилотни летала и еден од трите проектили што Русија ги лансираше во текот на ноќта.

Олех Кипер, регионалниот гувернер на Одеса, изјави дека двете лица кои загинале во предградијата на Одеса во саботата вечерта биле брачна двојка, а дека уште едно лице е рането во нападот.

Меѓувреме, руското Министерство за одбрана соопшти дека соборило 29 украински беспилотни летала во текот на ноќта кон неделата над западните и југозападните региони, при што не е предизвикана материјална штета.

Исто така, се наведува дека уште едно украинско беспилотно летало било соборено утрово над западниот регион Рјазан.

Последните напади уследија откако Украина во саботата упати нов повик до Западот да му дозволи да ги користи ракетите со долг дострел што ги обезбедија за да напаѓа цели длабоко во Русија, додека украинските сили се борат да го запрат рускиот напредок во источна Украина.