Министерството за земјоделство, шумарство и водостопанство (МЗШВ) информира дека во кратовско Таласманци, Шумската полиција запрела возило кое превезувало огревно дрво во количина од 8,70 метри кубни, управувано од лице вработено во Шумска полиција за кое по извршена контрола е утврдено дека е со несоодветни исправи и е одземено.

Настанот, како што информираат од МЗШВ, е регистриран вчера во 15 часот во м.в. Дупка, с.Таласманци, кратовско.

„При извршената контрола утврдено е дека лицето Ј.М. кое што управувало со возилото е вработено во Шумска полиција Крива Паланка и воедно е со несоодветни исправи, односно на самата испратница како возач на возилото наведено е друго лице со иницијали М.Ј. Од таа причина од страна на Шумската полиција возилото е привремено одземено и предадено е во ЈПНС Кратово до соодветна понатамошна постапка. Против вработеното лице ќе се спроведе постапка, одговорност за ова ќе има“, се вели во соопштението од МЗШВ.

Од МЗШВ, порачуваат дека законот е ист за сите и дека одговорност ќе има, како и дека продолжуваат максимално во стопирање на криминалот и нелегалната трговијата со дрво.