Силни дождови кои паднаа речиси колку целогодишната просечна количина предизвикаа поплави и свлечишта во Пекинг и околните области, усмртувајќи најмалку 38 лица.

Водата носеше автомобили, уриваше патишта и предизвика големи оштетувања, особено во руралниот округ Мијун, каде што загинаа 28 лица.

Над 80.000 лица беа евакуирани само во Пекинг, од кои 17.000 во Мијун.

Во последните четири дена, во градот Пекинг наврнале 54,3 сантиметри дожд — речиси колку што вообичаено паѓа во текот на цела година.

Во некои населени места, како што се два града во Мијун, измерени се и до 54 сантиметри дожд.

Бурата остави над 130 села без електрична енергија и ја уништи телекомуникациската инфраструктура, како и повеќе од 30 делници од патиштата.

Во соседната провинција Хебеи, пронајдени се уште четири жртви во руралниот округ Луанпинг, каде што претходно беа пријавени осум исчезнати по свлечиште.

Спасувачките екипи продолжуваат со потрагата, и покрај тешките услови на теренот. Кинескиот премиер Ли Кјанг ги повика надлежните служби на забрзани спасувачки акции и проценка на штетите.