Синот на норвешката принцеза Мете -Марит е осомничен во три случаи на силување и 23 други кривични дела, соопшти денеска полицијата во Осло.

28 годишниот Мариус Борг Хоиби, кој е посинок на идниот крал на Норвешка, принцот Хаакон, беше уапсен три пати минатата година, во август, септември и ноември.

По 10 месечната истрага, норвешката полиција сега го префрли случајот на обвинителите, кои ќе треба да одлучат дали ќе поднесат обвинение.

Хоиби, кој нема официјална кралска титула или официјални задолженија, бил предмет на истрага по неговото апсење на 4-ти август, под сомневање за напад.

Во полициското соопштение, полицијата на Осло, тврди дека била спроведена темелна истрага со интервју на голем број сведоци, биле извршени претреси на повеќе локации како и проверка на поголем дигитален материјал.

Помеѓу кривичните дела за кои Хоиби е осомничен се и четири случаи на сексуален напад и два случаи на нанесување телесни повреди.

Полицијата не сакаше да оди во детали за бројот на жртви во случајот против Мариус Борг Хоиби, освен дека станува збор за двоцифрен број на жртви.