Христијански верници се собраа во Црквата на Светиот Гроб во Ерусалим во саботата за да присуствуваат на древната церемонија на Светиот оган.

Коптски православен свештеник изрази радост што традицијата повторно се одбележува, откако светите места во Ерусалим беа затворени поради војната.

„Пред само два дена во Стариот град немаше апсолутно никој, изгледаше како напуштен град. Но сега гледаме прослави налик на свадби насекаде. Сите се среќни и исполнети со радост“, изјави отец Антониус Ал-Оршалеми. 

Светите места низ Стариот град на Ерусалим, вклучително џамијата Ал-Акса, Црквата на Светиот Гроб и Ѕидот на плачот, беа затворени 40 дена поради израелските безбедносни мерки воведени по војната со Иран. Соединетите Американски Држави и Иран во вторникот постигнаа договор за двонеделен прекин на огнот.

Во Ерусалим, обредот на Светиот оган датира најмалку 1.200 години наназад. Тој го симболизира воскресението на Исус Христос, при што грчкиот православен патријарх изнесува свеќи за кои се верува дека се запалени од чудотворен, „неизгорлив“ пламен од гробот, кој потоа се пренесува меѓу илјадници верници.

Православните цркви од источната традиција го следат постариот јулијански календар и Велигден ќе го прослават во недела.

T.Д.