Светот е на пат да се соочи со речиси два дополнителни месеци екстремно жешки денови годишно до крајот на векот, покажува најновиот извештај на меѓународни научници за климата. Но, благодарение на Парискиот климатски договор од 2015 година, ситуацијата не е толку катастрофална како што можела да биде – наместо 114 дополнителни жешки денови, ќе има околу 57. Истражувањето, направено од World Weather Attribution и Climate Central, користи компјутерски симулации за да покаже како климатските акции досега го намалиле бројот на „опасни денови“ – денови потопли од 90% од сличните денови во периодот 1991–2020… Светот веќе има 11 такви денови повеќе од 2015 година наваму. Најтешко ќе бидат погодени помалите и посиромашни земји како Самоа, Соломонски Острови и Панама – кои иако придонеле само 1% за глобалните емисии, ќе добијат 13% од дополнителните екстремно жешки денови. Од друга страна, големите загадувачи како САД, Кина и Индија ќе имаат само 23 до 30 дополнителни жешки денови, иако се одговорни за 42% од емисиите на штетни гасови.