Американскиот претседател Доналд Трамп потпиша нова забрана за патување во САД за државјани на 12 земји, меѓу кои Авганистан, Хаити и Иран.

Одлуката, како што беше објавено, има за цел да ги „заштити Американците од опасни странски туристи“.

Дополнително, на државјани од уште седум земји, вклучително и Куба и Венецуела, ќе им бидат воведени делумни ограничувања за патување. Од забраната се изземени одредени категории, вклучувајќи спортисти кои патуваат за меѓународни спортски настани, некои авганистански државјани и лица со двојно државјанство, од кои едното е на земја која не е опфатена со забраната.

Забраната, која стапува на сила на 9 јуни, беше објавена преку платформата „Truth Social“, каде Трамп како причина го посочи нападот во Колорадо што се случи во неделата.

Новата одлука потсетува на сличен потег од неговиот прв мандат во 2017 година, кога воведе забрана за патување за државјани од неколку земји со мнозинско муслиманско население.

Овој потег е исполнување на предизборното ветување од неговата кампања но се очекува да предизвика брзи правни предизвици и реакции.