Карабињерите во италијанската покраина Асти уапсија 47-годишен државјанин на Албанија со претходно криминално досие во координирана акција запленија 22 килограми кокаин, како и поголема количина оружје.

Акцијата е резултат на подолгорочна истражна работа и рутинско територијално следење, при што полициските службеници забележале повеќе сомнителни активности, меѓу кои чести движења и кратки средби во чувствителни подрачја.

Првата фаза од операцијата започнала со претрес на домот на осомничениот на улицата Виа Вајра во Асти, каде што биле пронајдени помали количини дрога, како и три пиштоли распоредени во различни делови од имотот, вклучувајќи стан, гаража и возило кое го користел осомничениот.

Подоцнежен претрес на втор имот поврзан со него, на Виа Палио, довел до откривање на значително поголема количина кокаин и дополнително скриено оружје. Вкупно биле запленети 22 килограми кокаин, што според проценките одговара на околу 100.000 улични дози со вредност од приближно 5 милиони евра.

Покрај дрогата, полицијата запленила пет пиштоли, од кои еден со избришан сериски број, домашно изработен пригушувач, над 200 куршуми муниција – вклучително и патрони од воен тип – како и опрема за мерење и пакување наркотични супстанции.

Осомничениот е уапсен и спроведен во затворот во Алесандрија. Италијанските власти истакнаа дека операцијата е резултат на континуирана истражна работа и локално следење, а не на поединечна интервенција.

Т.Д.