Специјалниот пратеник на американскиот претседател Доналд Трамп, Стив Виткоф, денеска се сретна со рускиот претседател Владимир Путин во Москва, само неколку дена пред да истече рокот што го постави Белата куќа за постигнување мировен договор меѓу Русија и Украина.

Средбата е потврдена од Кремљ, а се смета за последен обид да се избегнат сериозни економски санкции што Вашингтон се заканува да ги воведе.

Претходно во средата, Виткоф беше забележан со Кирил Дмитриев, рускиот претставник за инвестиции и економска соработка, што укажува дека економските теми, вклучително и можните санкции, се клучни во разговорите.

Од САД велат дека доколку не се постигне договор, ќе следуваат високи царини и други мерки, кои можат да ги погодат и земјите што продолжуваат да купуваат руска нафта.

Крајниот рок за постигнување договор истекува во петок, а администрацијата на Трамп јасно стави до знаење дека нема да толерира продолжување на конфликтот во Украина.

Сè уште нема официјална реакција од Киев, но дипломатски извори велат дека притисокот врз Москва значително се зголемува.