Русија го нападна украинскиот главен град со ракети и беспилотни летала рано наутро во саботата, ранувајќи најмалку 11 лица еден ден пред разговорите меѓу Украина и САД, соопштија локалните власти.

Експлозии одекнуваа низ главниот град со часови додека балистички ракети и беспилотни летала го погодија градот.

Нападот започна во раните утрински часови денеска и продолжи до зори.

Државната енергетска компанија „Укренерго“ воведе итни прекини на електричната енергија како резултат на нападите.

Нападот се случи во време кога украинскиот претседател Володимир Зеленски се подготвува да се сретне со американскиот претседател Доналд Трамп во недела за понатамошни разговори во обид да се стави крај на речиси четиригодишната војна.

Зеленски рече дека планираат да разговараат за прашања, вклучувајќи безбедносни гаранции и територијални прашања во регионите Донецк и Запорожје.

Две деца се меѓу повредените во нападот, кој зафати седум локации низ градот Киев, изјави началникот на Градската воена администрација на Киев, Тимур Ткаченко, во изјава за Телеграм.

Пожар избувна во 18-катна станбена зграда во областа Дњепарк во градот, а екипите за итни случаи брзо се упатија кон местото на настанот за да го локализираат пламенот.

Ткаченко рече дека е погодена и 24-катна станбена зграда во областа Дарница, а повеќе пожари избувнаа во областите Оболонски и Холосиевски.

Во поширокиот регион на Киев, во нападите се погодени индустриски и станбени згради, според Службата за итни случаи на Украина.

Во областа Вишгород, екипите за итни случаи спасија едно лице пронајдено под урнатините на уништена куќа.

Б.С.