Рускиот министер за надворешни работи Сергеј Лавров пристигна во Њујорк, каде на високо ниво ќе учествува на отворањето на Генералното собрание на ОН, пренесува „РИА Новости“.

Лавров последен пат го посети Њујорк во април, за време на руското претседателство со Советот за безбедност на ОН.

Во пресрет на актуелната посета, руското Министерство за надворешни работи соопшти дека распоредот на министерот е „многу зафатен и постојано се проширува“.

Предвидено е министерот да се сретне и со генералниот секретар на ОН, Антонио Гутереш.

Медиумите претходно објавија дека на истиот состанок на Советот за безбедност на ОН ќе учествува и украинскиот претседател Володимир Зеленски.

Ова ќе биде првпат од почетокот на војната Зеленски и руските претставници да бидат на иста маса.

• Реално ја оценуваме оваа средба, како и сите други политизирани западни иницијативи за украинската криза. Оценката е нула. Ова ќе биде уште едно шоу во кое главната улога ќе му биде доделена на украинскиот претседател – изјави претходно Небензја.

Лавров во петокот изјави дека Москва е подготвена да преговара за ставање крај на 18-месечниот конфликт со Украина, но го обвини Киев и неговите западни сојузници дека го нарушуваат напредокот.

• Околу темата за таканаречените преговори, се појавува вистински заговор и се обидува преку псевдодипломатија да се преврти сè наопаку, рече Лавров.