Образованието и науката се столб на развојот, поради што остануваме посветени на реформите што ќе обезбедат подобри можности за младите и поконкурентна држава, порача денеска министерката за образование и наука Весна Јаневска на прес-конференција во Владата, каде што даде отчет за сработеното во изминатите две години.

Според Јаневска, Министерството затекнало сериозни предизвици, но со системски пристап и посветена работа започнало процес на унапредување на квалитетот на образованието и зајакнување на научноистражувачката дејност.

Меѓу клучните активности што ги истакна се измените на законската регулатива во образованието, реконструкцијата на два студентски дома, мерките за олеснување на вработувањето на најдобрите студенти, воведувањето сменска настава, како и изградбата и реконструкцијата на училишта, спортски сали и други образовни објекти.

Таа нагласи дека овие реформи имаат цел да создадат поквалитетен образовен систем, подобри услови за учениците и студентите и поголема конкурентност на државата.