Правото на протест или штрајк е уставно загарантирано право на работниците, е ставот на Управата за јавни приходи (УЈП) во врска со состојбата меѓу Синдикатот на УЈП и Министерството за финансии.

„Вработените во било кој сегмент и сфера, вклучително и институциите како Управата за јавни приходи, имаат легитимно право да ги изразат своите ставови на ваков начин. Управата за јавни приходи во изминатиот период одржа низа состаноци со Министерството за финансии и на истите беа предочени и разгледани барањата кои се повод и за денешниот протест. Во оваа насока, јасно беа отворени точките кои ги засегаат вработените, додека се очекува предлог решение од ресорното Министерство“, се вели во соопштението на УЈП.

Од таму информираат дека, заедно со Синдикатот, во изминатиот период се работеше и на новиот текст од Колективниот договор со содржина која, како што се нагласува, била прифатена од сите и кој е пред потпишување, со единствена цел – подобар животен стандард за вработените.