Попладнево голем дел од општината Аеродром и населбата Ново Лисиче, како и делови од централното градско подрачје, останаа без електрична енергија. Жителите информираат дека прекинот трае повеќе од еден час и предизвикува проблем за домаќинствата, угостителските објекти и фирмите кои работат во овој дел од градот.

Од ЕВН потврдија дека станува збор за дефект на 110 киловолтната трафостаница „Аеродром“. Екипите на Електродистрибуција веднаш се упатиле на лице место за санација на дефектот, а противпожарни екипи исто така се присутни на терен.

Неофицијално, од ЕВН се сомневаат дека прекинот во снабдувањето може да е поврзан со пожарот што попладнево изби на депонијата Вардариште, во општина Гази Баба, кој е можно да предизвикал пад на електрично напојување на далноводот.

Засега нема дополнителни информации кога ќе биде воспоставено редовното снабдување со електрична енергија.