Папата Лав XIV упати силна порака за мир, осудувајќи ја „заблудата за семоќ“ која, според него, ги поттикнува воените конфликти, вклучително и војната меѓу САД и Иран.

Зборувајќи за време на вечерна молитвена служба во базиликата „Свети Петар“ во Ватикан, папата повика на прекин на насилството и на враќање кон дијалог и преговори.

„Царство во кое нема меч, нема беспилотно летало, нема одмазда, нема тривијализација на злото, туку само достоинство, разбирање и простување“, порача папата, предупредувајќи дека светскиот поредок е сериозно дестабилизиран.

Тој ги повика политичките лидери да се откажат од логиката на вооружување и сила, истакнувајќи дека „доволно е со идолопоклонството на себеси и парите, доволно е со покажување моќ, доволно е со војна“.

„Браќа и сестри, оние што се молат се свесни за своите ограничувања; тие не убиваат ниту се закануваат со смрт“, рече папата, додавајќи дека „смртта ги поробува оние што се оддалечиле од живиот Бог“.

Во својата порака, папата Лав XIV ги повика светските лидери да седнат на маса за дијалог и медијација, наместо да планираат воени акции, нагласувајќи дека одговорност за мир носат и политичарите и граѓаните ширум светот.

„Нека престане лудилото на војната, а Земјата да биде негувана од оние кои знаат да го сакаат животот“, порача тој.

Папата не ги спомена директно САД или претседателот Доналд Трамп, но неговата порака дојде во момент кога Вашингтон и Техеран започнаа директни преговори во Пакистан, по објавувањето на кревко примирје.

Според извештаите, ставовите на папата во последните недели станале поостри, откако претходно повикуваше претежно на воздржаност и дијалог, а оваа порака се толкува како една од неговите најсилни критики кон логиката на војната досега.

Ватикан изразува особена загриженост и за можната ескалација на конфликтот на Блискиот Исток и влијанието врз христијанските заедници во регионот.