Нови четири натпревари носи денешниот, осми, ден на Светското првенство во Катар, по два во групите Г и Х со кои ќе биде комплетирано второто коло на турнирот.

Србија од 11 часот ќе игра против Камерун во обид да стигне до прв триумф на Мундијалот и да ги сочува шансите за пласман меѓу 16-те најдобри на турнирот. Националниот тим на нашиот северен сосед на стартот загуби од Бразил со 0:2, додека Камерун беше поразен од Швајцарија со 0:1.

Бразилците, пак, во попладневниот термин (17 ч.) ќе играат против Швајцарците и со евентуален триумф ќе бидат втори сигурни осминафиналисти во Катар по Франција.

Во слична позиција се наоѓа и Португалија чија селекција, по стартната победа над Гана, вечерва (20 ч.) ќе излезе на мегдан со Уругвај, во обид да се пробие во осминафиналето на коло до крајот на групната фаза.

Од 14 часот ќе играат уште Јужна Кореја и Гана.