Деведесет и тројца загинати луѓе, над 2.700 уништени објекти и штета од, речиси, 5,6 милијарди долари. Ова се проценките од најсмртоносните пожари на Хаваи во последните 100 години, иако спасувачките екипи и натаму трагаат по жртви на огнената стихија. Дел од островот Мауји е како „воена зона“. Осумдесет отсто од пожарот во Лахаина е изгаснат, но противпожарните екипи сè уште се борат со пламените јазици на 20 отсто од територијата.

Гувернерот на Хаваи, Џош Грин очекува бројките на загинати лица од пожарите да растат. Обезбедени се 500-тини хотелски соби за лицата кои останаа без домови. Уште толку ќе бидат резервирани за вработените во Федералната агенција за вонредни состојби кои се ангажирани на терен. Според Грин, дел од хотелските капацитети ќе продолжат со вообичаената работа со цел да помогнат во зачувување на работните места и за одржување на локалната економија.