Може да одморите и на едно од трите столчиња да почекате она што три децении не се исполнува. На листата за чекање се автопатот Кичево-Охрид, борба против корупцијата, влезот во ЕУ, подобро здравство, повисоки плати, ефикасно судство, новиот клинички центар па дури и рамни шахти на улиците и учебниците за 3-то и 6-то одделение. „Чекалната„ каде може да се изначекате е во центарот на Скопје на Булеварот Партизански одреди пред Буњаковец.

Станува збор за креативно-активистичка акција на програмата за уметнички и креативен активизам на Центарот за современи уметности од Скопје во чест на македонските граѓани кои 30 години чекаат да се случи нешто и работите да тргнат на подобро.

„Идејата на оваа акција е да оддадеме почит на просечниот македонски граѓанин – чекач кој веќе 30 години непрекинато чека. Чекаме за подобар стандард, за влез во ЕУ, за битка со корупцијата,  за подобро здравство, чекаме-власта и партиите да работат во служба на граѓаните и што уште не. Година по година чекаме да се остварат неостварените ветувања. Всушност се нешто чекаме и станавме професионални чекачи. Токму затоа и ја изградивме оваа чекална каде секој може да си почека за она што најмногу му треба и она што му е најважно“, велат од Центарот за современи уметности.