Десет полицајци се повредени во пресметката со група агресивни осуденици во Идризово кои според МВР се обиделе да ги спречат да извршат претрес со судска наредба. Акцијата била рано наутро, а над 60-тина осуденици се собрале и се обиделе да ја спречат полицијата да ја врши рацијата.

Но, затвореници со кои контактираше Телма тврдат дека тие биле нападнати и тепани од полицијата. Велат ни ја расфрлаа и уништија храната, не тепаа, а некои имаат скршени заби и повреди на аркадата и на главата.

Директорот на затворот Зоран Јовановски не се јавуваше, а Телма контактираше со заменик директорот на затворот Феми Јонузи кој ни рече дека е повикана Итна помош и ќе има официјални информации кога се ќе се заврши.

Во полуотвореното одделение во Идризово има подобри услови отколку во затворениот дел во најголемиот затвор во државата.

Министерството за правда подготви нов закон за амнестија, а токму осудениците во полуотвореното одделение на Идризово ќе може, доколку се усвои законот, да бараат намалување на казните до 30 проценти.

Миомир Серафиновиќ