Според пишувањето на медиумите во Италија, преговорите меѓу Виктор Осимен и Наполи влегоа во завршна фаза и нигерискиот репрезентативец е многу блиску до продолжување на договорот.

Еден од најдобрите фудбалери во составот на шампионот на Италија се поврзуваше со евентуален трансфер во Премиер лигата, а како заинтересирани страни се споменуваа Ливерпул, Арсенал, Челзи и Манчестер Јунајтед, но очигледно дека Осимен и по завршувањето на сезоната ќе остане во Неапол.

Осимен до крајот на актуелниот договор има уште 18 месеци, а според најавите тој ќе ја продолжи соработката на уште најмалку една година, а се очекува и да се зголеми откупната клаузула за предвремен раскин.

Од доаѓањето во Наполи во текот на летото 2020 година, Осимен на 113 натпревари постигна 65 гола во сите конкуренции и се смета за еден од најзаслужните за првата титула која беше освоена по пауза од 32 години.