Македонската ракометна репрезентација ги продолжува подготовките во Стара Пазова во Србија во пресрет на Европското првенство во Германија во јануари. Тимот од денеска е комплетен со приклучувањето на капитенот Никола Митревски.

Селекторот Кирил Лазаров конечно на располагање ги има сите играчи кои ги повика за подготовките пред континенталниот турнир. Митревски поради клупски обврски со Порто најдоцна се приклучи кон тимот, кој сега е комплетен. На овие тренинзи стручниот штаб става акцент повеќе на физичката подготвеност на играчите со цел да бидат на најдобро можно ниво за стартот на ЕП на 10 јануари. Се наближува и првиот тест на Македонија, а тоа е Црна Гора со која ракометарите ќе одиграат контролен меч од три пати по 30 минути. Во јануари пред заминувањето за Дизелдорф нашите ракометари уште два пати ќе ја тестираат својата форма со Грција во Скопје.