Италијанската фудбалска федерација донесе одлука од следната сезона, секој клуб што ќе се натпреварува во Серија А при лиценцирањето мора да потпише клаузула со која му се забранува учество во Суперлигата.

Секој италијански клуб кој нема да го потпише договорот нема да добие лиценца да се натпреварува во лигата и автоматски ќе биде исфрлен во понизок ранг. Клубовите ќе мораат да учествуваат само во натпреварувања организирани од Италијанската федерација, ФИФА и УЕФА.

Во првиот обид да се формира Суперлигата, три италијански клубови беа дел од проектот, Интер, Милан и Јувентус. Миланските клубови брзо се повлекоа од идејата, додека Јувентус остана верен на проектот, бидејќи тогашниот претседател Андреа Ањели беше еден од креаторите на истиот.

Засега јавно само Наполи изрази интерес да се приклучи кон Суперлигата, која засега брои само два клуба, а тоа се Реал Мадрид и Барселона.