Застарената иранска хеликоптерска флота е во центарот на вниманието по несреќата минатата недела во која загинаа претседателот Ебрахим Раиси, министерот за надворешни работи Хосеин Амир-Абдолахиан и седум други членови на делегацијата.

Децениската флота, која се состои од различни модели купени пред Исламската револуција во 1979 година, наводно се соочува со значителни предизвици за одржување и набавка на делови поради продолжените меѓународни санкции.

Овие проблеми сериозно се одразиле на нивната оперативност и не се знае колку авиони и хеликоптери се функционални.

Значаен дел од иранската хеликоптерска флота се состои од хеликоптери од американско производство.

Иран има осум „Sikorsky SH-3 Sea Kings“, првично дизајнирани за противподморничка војна, но подоцна прилагодени за ВИП транспорт.

Врховниот водач на земјата, ајатолахот Али Хамнеи ретко користи хеликоптери, претпочитајќи авиони дури и за кратки патувања во земјата и покрај тоа што има флота способна за ВИП транспорт.

Овие хеликоптери беа користени од американската морнарица од 1961 година до 2006 година кога конечно беа пензионирани.

Иран има и неколку поморски „RH-53D“, првенствено набавени за задачи за откривање поморски мини.

Земјата презеде и чекори за локално производство и менување на постоечките модели на хеликоптери како одговор на санкциите и недостигот на делови.