Архиварите во Собранието денеска го примија списокот со предлог министрите во новата влада. Мандатарот го достави заедно со нивните биографии и предлог програмата за работа на идната Влада.

Пратениците имаат три дена да ги разгледаат и да ги подготват дискусиите за седницата која ќе почне во сабота претпладне и треба да заврши најдоцна во недела на полноќ. Мицкоски повтори дека има големи очекувања од идните министри.

ГРАЃАНИТЕ ОЧЕКУВААТ БРЗИ РЕЗУЛТАТИ ЗА ОНА ШТО ОВАА ВЛАДА ГО ВЕТУВАШЕ ДЕКА ЌЕ ГО ИСПОРАЧУВА. НЕ ВЕТУВАВМЕ МНОГУ ЗА ВРЕМЕ НА КАМПАЊАТА, ТУКУ ВЕРУВАВМЕ ДЕКА ЗЕМЈАВА ЌЕ БИДЕ ПОВТОРНО НА ГРАЃАНИТЕ. ИЗМИНАТИтЕ СЕДУМ ГОДИНИ ДРЖАВАТА БЕШЕ ЗАРОБЕНА ОД НЕКОЛКУМИНА ВЛАСТОДРШЦИ, РЕЧЕ МИЦКОСКИ.

Мицкоски очекува и брзи резултати во економијата, порача дека бизнисмените може да се чувствуваат сигурно, ги охрабри да вложуваат во проширувањето на капацитетите и да вработуваат повеќе.

Ветува подобрување на статусот на земјоделците и зголемување на пензиите уште во првата година, средства за капитални проекти во општините. Но, и расчистување со криминалот на претходните влади.

ПЛАНИРАМЕ ДА РАСЧИСТИМЕ СО СОМНЕЖИТЕ И ИНФОРМАЦИИТЕ КОИ ПОСЛЕДНИОВ ПЕРИОД СТИГААТ ДО НАС, ЗА МНОГУ ЗЛОУПОТРЕБИ ИЗМИНАТИВЕ СЕДУМ ГОДИНИ, ТОА ИМ ГО ДОЛЖИМЕ НА ГРАЃАНИТЕ. ОЧЕКУВАМ БРЗИ РЕЗУЛТАТИ ВО ДЕЛОТ НА ЕКОНОМИЈАТА. МЛАДИТЕ ЌЕ БИДАТ НАШ ГЛАВЕН АКЦЕНТ, СВЕДОЦИ СМЕ НА КЛАСИЧЕН ЕГЗОДУС НА МЛАДИ КОИ ЈА НАПУШТААТ ЗЕМЈАВА, ЗА ЖАЛ 8/10 МОИ СТУДЕНТИ КОГА ЌЕ ГИ ПРАШАТЕ ЗА НИВНИТЕ ПЛАНОВИ ПО ЗАВРШУВАЊЕТО НА СТУДИИТЕ, ВЕЛАТ ДЕКА ОДЛУЧИЛЕ ДА ЈА НАПУШТАТ ЗЕМЈАВА. ТАА ПЕРЦЕПЦИЈА ТРЕБА ДА СЕ ПРОМЕНИ, СО НАПОРНА РАБОТА, БЕЗ ПОДЕЛБА ОД ПРВ, ВТОР И ТРЕТ РЕД ГРАЃАНИ, РЕЧЕ МИЦКОСКИ.

Во однос на СДСМ, повтори дека,ќе почека да се консолидираат по внатрешните превирања, по што е подготвен да им подаде рака за соработка и национално помирување.

Далиборка Демјанска Цветановска