Македонската таеквондистка Милјана Рељиќ успеа да направи голема сензација во првото коло на Олимписките игри во Париз елиминирајќи ја двократната олимписка шампионка Џејд Џоунс од Велика Британија.

Рељиќ, која дебитира на големата сцена и настапува со вајл-карта на таеквондо турнирот  во категоријата до 57 килограми ја совлада третата фаворитка со 2-1 во рунди. Првата рунда и припадна на Македонката со 7-6, а втората ја доби Британката со 4-5. Во решавачката трета рунда беше 1-1, но победата и припадна на Рељиќ поради вкупно повеќе зададени удари. Џоунс е двократна олимписка шампионка од Лондон во 2012 и од Рио четири години подоцна, а на овие игри сакаше да стигна до историско трето злато, но беше запрена од нашата натпреварувачка.

Во 15:45 часот, Рељиќ во четвртфиналето ќе се бори со Либанката Летиција Оун.