Првата вечер од конвенцијата на Демократската партија во Чикаго, на која официјално треба да биде потврдена кандидатурата на Камала Харис, беше посветена на претседателот во заминување Џо Бајден.

Откако минатиот месец, по огромниот притисок од своите сопартијци, Бајден беше принуден да се повлече од трката за освојување на втор мандат во Белата куќа, неговата администрација во последните неколку месеци ги насочи напорите кон гарантирање на неговото место во историјата на американската политика.

И говорот на самиот Бајден, громогласно поздравен од публиката, беше фокусиран кон неговото наследство, но неизбежен е заклучокот дека неговото место во историјата ќе зависи од тоа дали Харис ќе успее да го победи Доналд Трамп на изборите во ноември.