Намалување на цените на прехранбени производи има но не на сите, месечната заштеда на едно семејство е до 20 евра а првите ефекти од Законот за забрана на нефер трговски практики граѓаните ќе ги почувствуваат откако големите трговци ќе ги истрошат залихите во магацините и ќе набават производи согласно новите регулативи, кажа министерот за економија Бесар Дурмиши во отчетот за сработеното во првите 100 дена од Владата. Сепак Комисијата за заштита на конкуренцијата која треба да проверува дали големите трговци нашле дупки во Законот за нефер трговски практики сеуште е нефункционална, потврди Дурмиши.

Есенската потрошувачка кошница и Законот за забрана на нефер трговски практики спречија натамошен раст на цените на прехранбените производи и на инфлацијата.

„ Првичните анализи од терен кажуваат дека цените на производите од есенската кошничка се намалени во просек од 5 до 10 проценти при што кај некои производи намалувањето е помало или воопшто го нема како лебот маслото за јадење и млекото. Искажано во заштеда на пари, за едно четворочлено семејство на месечно ниво заштедата изнесува од 690 до 1.360 денари во зависност од начинот на исхрана и изборот на маркети каде што се купува“, изјави Дурмиши.

Иако Законот за забрана на нефер трговски практики е на сила, цените се исти бидејќи според Дурмиши, во магацините имале залихи кои требало прво да се потрошат а потоа да се набават нови и тогаш ќе имало дополнително намалување на цените.

„ Законот за нефер трговски практики стапи на сила. Додека да се потрошат производите кои маркетите ги имаат во залихи нормално е дека се продаваат по старите цени. Кога ќе се направат новите фактури, добавувачите со купувачите треба да ги усогласат цените и новите производи ќе излегуваат со намалени цени“, вели Дурмиши.

Сепак дел од добавувачите тврдат дека големите трговци успеале да го изиграат Законот за забрана на нефер трговски практики, ги условуваат со откажување на нарачки на стока доколку не се потпише договор по нивни услови а не согласно новиот закон. Најчесто станува збор за повратот на стока но и за вметнување на ставки и клазули со кои треба да се надоместат десетте проценти за маркетинг кои сега се забранети.

Контрола за спроведување на овој закон треба да врши Комисија за заштита на конкуренцијата, која според Владините одредби до крајот на годинава смее само да опоменува, но и тоа нема да се случи бидејќи не е функционална и добавувачите немаат каде да пријават притисоци од големите трговци.

„Така како што е Комисијата не е функционална. Ни треба тој закон за Комисијата да го изгласаме во Собрание, да го надополниме и да им дадеме ингеренции и да се реорганизира за да биде функционална“, кажа Дурмиши.

На денешната седница на Влада треба да се формира економско социјалниот совет кој првиот состанок со синдикатите и организацијата на работодавачи ќе го одржи во четврток.

Oгнен Чанчаревиќ