Задоволни сме од одѕивот на граѓаните кои одлично не примаат и покрај отежнатите услови на кампањата поради здравствената криза, нагласи вечерва во Гевгелија носителот на кандидатската листа во ИЕ 4, Бранко Ристов, за време на отворањето на канцеларијата на локалниот огранок на партијата.

– Мислам дека народот конечно е подготвен да го скрши овој бипартизам кој што триесет години не тоне се подлабоко во дупката и конечно да почнеме да создаваме функционална држава, рече Ристов.

Откако „Левица“ ќе влезе во парламентот, носителот на кандидатската листа во ИЕ 4, на гевгеличани им вети дека партијата ќе се залага за бесплатно здравство и високо образование, за укинување на извршителите, за воведување систем на надворешна контрола на МВР, за носење Закон за потекло на имот, скратено работно време од осум на шест часа и за поништување на Преспанскиот договор и двојазичноста.

Тој ги повика гевгеличани без двоумење да го заокружат бројот 4 на гласачкото ливче на предвремените парламентарни избори на 15 јули.