Македонската машка одбојкарска репрезентација ги дозна противниците во најновото издание на Златната лига на ЦЕВ во која учествуваат вкупно 12 селекции од Стариот континент. За нашиот тим ова е трета сезона по ред во елитно натпреварување.

Македонија ќе одигра вкупно шест натпревари на три турнири во новото издание на Златната лига што ќе се одржи во месец јуни 2025 година. На првиот турнир од 6 до 8.јуни, нашите одбојкари ќе играат во Словачка, каде освен домашната селекција противник ќе ни биде и Финска. Вториот турнир ќе се одржи во Летонија, а освен со домашната селекција ќе ги одмериме силите и со Грција.

Македонија ќе биде домаќин на последниот турнир од 20-22.јуни, а противници ќе ни бидат Црна Гора и Израел.

По одигрувањето на сите натпревари ќе биде формирана заедничка табела на сите 12 репрезентации и само најдобрите четири тимови ќе обезбедат пласман на завршниот турнир што ќе се одржи од 4 до 6 јули 2025 година. Домаќинот дополнително ќе биде одреден.

Фото: Игор Паневски