Град Скопје ја поздрави одлуката на владата за отворање на државните нафтени резерви за позајмица на ЈСП Скопје за надминување на кризата во јавниот превоз во главниот град.

„Ја поздравуваме одлуката на Владата со која, конечно, се докажа дека секогаш е подобро политика да се води со разум, а не со инает, и дека доколку јавниот интерес е на прво место можно е конструктивно да се делува во интерес на граѓаните. Потсетуваме дека Владата сè уште има долг од 500 милиони денари кон ЈСП Скопје за студентскипт стандард и бесплатниот студентски превоз, со кои ќе се стабилизира во целост состојбата во претпријатието“, се вели во соопштението на Град Скопје.

Дополнително, од Град Скопје ја повикуваат „советничката група на ВМРО-ДПМНЕ да го следи позитивниот пример на Владата и разумно, со грижа за интересот на граѓаните како приоритет, да ги донесе одлуките во Советот на град Скопје неопходни за подобрување на состојбите во јавниот превоз“.

„Апелираме на следната седница, конечно, по повеќе од две години советниците да ги изгласаат точките за нови автобуси за ЈСП, како и за отпочнување на реализација на проектот за БРТ каде се предвидени дополнителни 60 автобуси, адаптирано согласно ветувањата од програмата „За Модерно Скопје“. Важно е и советниците да заземат став за барањата на приватните превозници што како одлука единствено тие можат да ја донесат за во целост да се нормализира јавниот превоз“, се додава во дописот од Град Скопје.