Првата седница на новиот состав на грузискиот парламент мина во сенка на масовните протести на опозицијата. Дел од демонстрантите ја минаа ноќта под отворено небо, дел, пак, во шатори пред зградата на парламентот во Тбилиси која ја чуваат силни полициски сили и припадници на специјалните единици.

Опозициските претставници и нивни симпатизери протестираат поради резултатите од изборите на 26 октомври на кои владеачката партија „Грузиски сон“ освои 54 отсто од гласови. Тие обвинуваат за изборен фалсификат и изразуваат сомнеж за мешање на Русија во процесот. Власта, пак, ги отфрли таквите тврдењата на опозицијата.

Незадоволни од исходот, опозициските партии најавуваат дека нема да учествуваат во парламентарните активности. Набљудувачите рекоа дека изборите се одржале во атмосфера на „поделба“, одбележана со случаи на поткуп, двојно гласање и физичко насилство.