Групата седумте најразвити индустриски земји, работи на усогласување на заеднички став во врска со издадената потерница против израелскиот премиер Бенјамин Нетанјаху од страна на Меѓународниот кривичен суд.

Италијанскиот министер за надворешни работи, Антонио Тајани, изјави дека Г7 мора да биде обединета околу ова прашање. САД, членка на Г7, ја отфрлија одлуката на МКС, изразувајќи загриженост поради брзањето на обвинителот и процесуалните грешки што довеле до издавањето на налогот за апсење.

Германија, пак, ја нагласи својата обврска да ги почитува законите, што може да резултира во апсење на Нетанјаху доколку тој отпатува во Германија.

МКС издаде налози за апсење на Нетанјаху и поранешниот министер за одбрана Јоав Галант, обвинувајќи ги за воени злосторства, вклучувајќи го методот на гладување и други злосторства против човештвото во Газа. Израел ја осуди оваа одлука, нарекувајќи ја „антисемитска и апсурдна“, и соопшти дека ја отфрла.