За работа во градинките ќе се издаваат лиценци на македонски јазик за сите, а доколку некој побара, ќе добие и лиценца плус, на албански јазик. Мнозинството пратеници го изгласаа амандманот на ВМРО ДПМНЕ и ЗНАМ, поднесен откако претседателката Сиљановска-Давкова не го потпиша указот за  Законот за заштита на децата и побара доработка.

Амандманите на СДСМ и на Левица, беа одбиени,  што предизвика политички препукувања и обвинувања, особено за закочениот систем на полагање за лиценци во детската заштита, кој не функционира веќе три години, па околу 3 илјади лица не можат да се вработат во градинките.

Опозицијата обвини и за воведување на двојазичност, но за мнозинството и тоа е дефокус од вистинскиот проблем.

Вториот амандман на мнозинството предвидува лиценците да се полагаат по електронски пат, а по потреба, кога електронскиот систем не е во функција, и писмено.

Сиљановска-Давкова непосредно пред Нова година, одби да го потпише указот за законот поради повеќе спорни одредби. Побара членовите 9 и 10 да се преиспитаат низ призма на амандманот 5 од Уставот и постоечкиот закон за употреба на јазиците.

Далиборка Демјанска