Продолжи судењето за убиството на Вања Ѓорчевска и Панче Жежовски, при што Обвинителството презентираше видео записи од безбедносни камери како нови докази.

На снимките од Хотел Парк, се гледа како возилата „Цитроен“ и „Рено Кангу“ влегуваат во Дебар Маало, каде беше извршено грабнувањето на Вања на 27 ноември 2023 година.

Обвинителката Ана Стојковиќ Димитровска ги презентираше доказите, истакнувајќи дека на снимките се гледа како возилото „Цитроен“ минува на улицата пред хотелот, што се поклопува со времето на грабнувањето.

Во текот на рочиштето, обвинетиот Љупчо Палевски ја повтори својата претходна молба за изземање на обвинителката Жаклина Крстевска и целото Обвинителство.

Судот ја отфрли молбата и продолжи со изведување на доказите.

Првообвинетиот, Палевски, постави прашања во врска со некои докази кои не се приложени, како што е пиштолот на еден од обвинетите.

На првото рочиште, обвинетите отфрлија вина, а обвинителството тврди дека тие заедно ги планирале грабнувањата на Вања и Панче и нивните убиства.