Елена Петрова брутално и без трошка осет за одговорност ја лаже јавноста за повратот на ДДВ, се вели во реакцијата на СДСМ на денешното обраќање на директорката на Управата за јавни приходи (УЈП), Елена Петрова која изјави дека исплатата на парите од услугата МојДДВ и за поврат на ДДВ за компаниите тече континуирано.

„Доволно е да поразговарате со компаниите и менаџерите за да ја слушнете вистината – повратот на ДДВ доцни постојано. Оваа пракса на задоцнето ДДВ не е непозната за ВМРО-ДПМНЕ тие така владееја во време на режимот, така владеат и сега. Нема никаква промена и главната цел е притисок врз компаниите и задржување на средства кои нив им се потребни за работење“, тврдат од СДСМ.

СДСМ повеќе пати апелираше дека ова е голем проблем и до нас стигаат секојдневни поплаки од компаниите. Наместо да го решат проблемот и УЈП да биде вистински партнер на бизнисот, тие мислат дека преку лаги може да го покријат својот неуспех и погрешни стратегии, додаваат од опозициската партија.

Исплатата на парите од услугата МојДДВ и за поврат на ДДВ за компаниите тече континуирано, порача денеска директорката на Управата за јавни приходи (УЈП), Елена Петрова. Нагласи дека прво треба да заврши обработката на кварталните даночните пријави кои се поднесени до 25 јануари по што почнува исплатата на средствата од МојДДВ. За исплата на средства за МојДДВ, како што посочи, за изминатиот квартал се предвидени 870 милиони денари.

Петрова: Континуирано тече исплатата на парите за МојДДВ и за поврат на ДДВ за компаниите