Откако беше обелоденето дека на повикот за јавно приватно партнерство е избран единствениот конкурент, компанијата Ѓока од Албанија, министерот за здравство вели дека цената на паркирањето ќе поскапи доколку на крај се потпише договорот распишан за 20-годишно стопанисување со паркингот во кругот на Клиничкиот Центар.
-Процедурата е помината, меѓутоа повторно треба да помине уште одредени филтри, коишто поминуваат во Влада. Јас не се разбирам во тоа, и да ми дадете портфолио, меѓутоа не е за 20 години, чисто да ви кажам. По физибилитетот е предвидено да биде за 20 години, меѓутоа во меѓувреме, имаме одлука на Влада дека паркингот може да се користи додека Клиничкиот центар е тука. Јас лично мислам дека Клиничкиот центар нема да биде тука повеќе од 7-8 години. Ние сме го ставиле и тоа како услов, дека додека е Клиничкиот тука, 5 години,6, 8, 9, 10 години, но лично мислам дека нема да остане овде повеќе од 7-8, еве речете 10 години. Нема да биде повеќе. Затоа интересот на компаниите беше мал, да беше за 20 години, сигурно ќе се јавеа – рече Таравари.
Цените за паркингот ќе биде 50 денари на час, а зголемувањето на цената (од 30 на 50 денари) Таравари го оправдува со тоа што цената одела на аукција и таа цена била понудена. Смета дека не е превисока за Скопје, и додава дека „тука имавме автомобили кои ги оставаа тука и после излегуваа во град“.
-Имајќи предвид и какви се цените мислам дека не е лоша. Најдобро е 0 денари да биде, ако најдете таков понудувач, одлично ќе биде. 50 денари мислам дека е пристојна цена, затоа што пред „Нова Македонија“ е 40 денари. Не е цена која е многу висока, таа беше дадена на аукција. Во Скопје има цени кои се 100 денари, 150 денари, вели Таравари.
Според договорот, кој се уште не е финализиран, компанијата треба да изгради и катна гаража во рок од 6 месеци до една година од преземањето на паркингот.
