Објектот немал хидрантска мрежа, ниту имал хидрант во употребна функција. Ова го утврдиле обвинителите при денешниот увид во објектот во Кочани кој функционирал како дискотека во која ноќеска, во стравичен пожар, загинаа 59 лица, а 155 се повредени, изјави државниот јавцен обвинител Љупчо Коцевски.

„Немало доволен број на противпожарни апарати според квадратурата на објектот, односно имало само два. Немало две излезни врати пропишани за евакуација на луѓе, туку имало една единечна импровизирана метална врата на задниот дел од објектот, но истата била заклучена со катанец и без квака од внатрешната страна и обложена со гипс картон и сунѓер за звучна изолација. Немало пристап за противпожарни возила од двете спротивни страни, согласно Правилникот за заштита од пожари, експлозии и опасни материи“, изјави Коцевски.

Како што додаде, внатрешноста на објектот била обложена со гипс картон, но истиот не бил со огноотпорни својства.

„Во објектот противзаконски биле користени пиротехнички материјали на висина од три метри, без соодветна дозвола“, истакна Коцевски.