Рускиот претседател Владимир Путин во своето најново телевизиско обраќање порача дека Русија располага со доволно воени, економски и политички ресурси за да го доведе конфликтот во Украина, кој започна во февруари 2022 година, до „логичен заклучок со резултат што ѝ е потребен на Русија“.

„Имаме доволно сила и ресурси за да го доведеме започнатото во 2022 година до крај на начин што ќе одговара на нашите национални интереси. Тој резултат не е само воена победа, туку елиминација на причините што доведоа до кризата, создавање услови за долгорочен и стабилен мир и обезбедување на безбедноста на руската држава“, изјави Путин во интервјуто што беше емитувано денеска на државната телевизија.

Според него, конфликтот не се води само на бојното поле, туку и на политички, историски и културен план.

„Целта е да се заштитат интересите на нашиот народ, особено на оние кои живеат во териториите за кои постојано зборуваме – каде што луѓето го сметаат рускиот јазик за свој мајчин, и Русија за своја татковина. Тие луѓе не треба да бидат оставени без заштита“, додаде рускиот претседател.

Путин во своето обраќање не наведе конкретни рокови или детали за понатамошните чекори, но го нагласи уверувањето дека Русија ќе успее да ги реализира своите цели.

Обраќањето доаѓа во време кога Русија продолжува со интензивни напади врз Украина, вклучувајќи и масовна употреба на беспилотни летала, додека на меѓународен план сè почесто се зборува за потребата од преговори и дипломатско решение на конфликтот.

Обраќањето на Путин се гледа како обид да се покаже внатрешна стабилност и решителност, во време кога војната сè повеќе го исцрпува регионот, а меѓународната заедница врши зголемен притисок за мирно решение.