По голема полициска потрага што траеше речиси два дена, властите во Минесота го уапсија Ванс Боелтер, осомничен за убиство на поранешната претседателка на Претставничкиот дом Мелиса Хортман и нејзиниот сопруг Марк, како и за ранување на сенаторот Џон Хофман и неговата сопруга Ивет.

Нападите се случија во саботата наутро во нивните домови во предградијата на Минеаполис — прво кај семејството Хофман во Чамплин, а потоа кај Хортманови во Бруклин Парк. Боелтер бил уапсен во неделата вечерта во рурална област во округот Сибли, југозападно од Минеаполис.

Според властите, бил пронајден во поле и не се верува дека имал соучесници. Кривичната пријава против Боелтер, вклучува две обвиненија за убиство од втор степен и две за обид за убиство. Според обвинението, тој за време на инцидентот носел маска и се претставувал како полицаец, дури модификувал возило да изгледа како полициско.