Обвинителството за гонење на организиран криминал и корупција потврди дека уште на 12-ти јуни е поднесено обвинение против Ангел Сарамаков, член на обезбедувањето на премиерот Христијан Мицкоски кој беше уапсен на почетокот на април.
Обвинителството потврди дека против Сарамаков е поднесено обвинение за оддавање на службена тајна од користољубие. За ова дело, предвидена е минимална затворска казна од една година. Сарамаков беше уапсен во Велес со документација од истраги на велешката полиција, а наводно обезбедувачот на премиерот ги продавал тајните истражни информации за 50 илјади евра за да бидат објавени на социјални мрежи.
Оттогаш уапсениот Сарамаков е во притвор и е отстранет од обезбедувањето на премиерот каде бил ангажиран од лани кога е префрлен во Шестата управа на МВР.
Од обвинителството велат дека сега се чека одобрување на обвинителниот акт од надлежниот Кривичен суд во Скопје. Не е опфатен никој друг со обвинението.
