Според последните информации од Центарот за управување со кризи, на територијата на државата утринава до 8 часот се регистрирани три активни пожари. Сите се на тешко пристапни терени и ангажирани се надлежните служби за нивно следење и гаснење.

Во прилепското село Бешиште гори приземна мешана шума со квалитетна вегетација, што го прави пожарот сериозна закана за поширокиот шумски појас.

Во село Црешнево, општина Македонски Брод, активен е пожар во деградирана дабова шума и грмушки, со потенцијал да се прошири доколку условите се влошат.

Пожарот под Солунска Глава, на територијата на општина Чашка, сè уште не е целосно изгаснат. Се наоѓа помеѓу местата Изворите на Бабуна и Бабина Дупка, во карпест предел.

Засега, според ЦУК, нема видливи пламени јазици, туку само чад, но ситуацијата се следи внимателно.

Властите апелираат до граѓаните на внимателност и одговорно однесување во природа.