Соединетите Американски Држави соопштија дека се договорени „конкретни чекори“ за ставање крај на насилствата во сириската провинција Суејда, каде од неделата досега загинаа над 350 лица во судири меѓу милиции на друзите и бедуински племиња. Израелската војска претходно изврши серија воздушни напади врз сириското Министерство за одбрана во Дамаск и други цели, во обид да изврши притисок за повлекување на сириските трупи од регионот.

Американскиот државен секретар Марко Рубио изјави дека се преземени конкретни мерки за „веднаш да се прекине оваа загрижувачка и ужасна ситуација“. Сириската армија почна повлекување од Суејда во координација со локалните верски лидери, додека израелскиот премиер Бенјамин Нетанјаху вети заштита на друзите, поврзани со заедницата во Израел и Голанската висорамнина.

Состојбата во Суејда брзо се влоши, со извештаи за недостиг на медицински материјали, вода и жртви меѓу цивилите. Сириското Министерство за здравство соопшти дека во градската болница се пронајдени десетици тела, додека локални жители сведочеа за снајперски напади, артилериски оган и грабежи од владините сили.