Сирија ќе ги одржи своите први парламентарни избори под новите власти во периодот од 15 до 20 септември, соопшти  претседателот на Високиот комитет за избори во Народното собрание, Мохамед Таха ал-Ахмад.

Овие избори ќе се одржат по падот на претседателот Башар ал-Асад во декември минатата година, кога бунтовничките сили презедоа контрола врз Дамаск во ненадејна офанзива.

Според новиот устав, една третина од 210 пратенички места ќе ги назначи привремениот претседател Ахмад ал-Шараа, додека останатите ќе бидат индиректно избрани.

Ал-Ахмад истакна дека најмалку 20% од членовите на изборните тела ќе бидат жени и дека изборниот процес ќе биде набљудуван од меѓународни организации.

Привремениот устав, потпишан во март, предвидува создавање на Народен комитет како преоден парламент додека не се усвои траен устав и не се одржат општи избори – процес кој може да трае со години.

Најавата доаѓа во услови на сè поголеми поделби во земјата, особено по избувнувањето на меѓуверско насилство во јужната провинција Суејда.

Насилството меѓу бедуински кланови и борци од заедницата на друзите остави стотици мртви, а државните сили интервенираа – номинално за да воспостават ред, но реално застанаа на страната на клановите.