Царинските службеници на граничниот премин Табановце – Прешево при детален преглед на возило со српски регистарски таблички пронашле три луксузни часовници – два „Rolex“ и еден „Omega“ кои биле скриени во ранец. Возачот се обидел да ги внесе во земјава без да ги пријави, криејќи ги во мала кожна кутија меѓу предмети за лична употреба.

„Спречен е обид за криумчарење на часовници во вкупна вредност од 2,34 милиони денари или околу 38 илјади евра. Против лицето е поднесена кривична пријава за криумчарење,“ соопшти Царинската управа.

Станува збор за модели Rolex Submariner, Rolex Sky-Dweller и Omega Speedmaster, а запленетите производи се предадени на Основното јавно обвинителство Куманово.