Марко Бецеки од Априлија имаше перфектна сабота, бидејќи ќе стартува од пол-позицијата за утрешната трка за Големата награда на Сан Марино во рамки на Мото ГП шампионатот, а воедно славеше и на спринт трката.

Бецеки имаше фантастичен настап пред домашната публика на патеката „Мизано“ и во квалификациите имаше најбрз круг со време од 1 минута, 30 секунди и 134 илјадитинки. Второ време имаше Алекс Маркез, додека трет ќе тргне Фабио Квартараро. Лидерот во генералниот поредок Марк Маркез денеска беше само четврти во квалификациите.

На спринтот повторно најбрз беше Бецеки пред Алекс Маркез и Фабио ди Џанантонио. Марк Маркез на половина од спринтот се проби до првото место, но кратко потоа загуби контрола над својот Дукати и излета од трката со што ја прекина низата од осум спринт победи по ред.

Утрешната главна трка за Големата награда на Сан Марино стартува од 15 часот.