Израел ќе ја загуби сета поддршка од САД ако продолжи со анексијата на окупираниот Западен брег, порача американскиот претседател Доналд Трамп.

„Тоа нема да се случи. Нема да се случи. Нема да се случи, бидејќи им дадов збор за арапските земји. И тоа не можете да го сторите. Имавме голема арапска поддршка. Израел би ја загубил сета поддршка од САД ако се случи тоа“, рече Трамп во интервју за магазинот „Тајм“.

Идентични пораки испратија и потпретседателот на САД; Џеј ди Венс и американскиот државен секретар, Марко Рубио кои остро го критикуваа потегот на израелскиот парламент кој симболично покрена процес за анексија на окупираниот Западен Брег, пренесува „Би-Би-Си“.

По завршување на посетата на Израел, Венс го нарече потегот „многу глуп политички трик“. Рубио, пак, пред патување за Израел предупреди дека анексијата би можела да го загрози мировниот план на претседателот Трамп за завршување на војната во Газа.